خیبر پختونخوا کے ضلع بنوں میں ملیخیل چیک پوسٹ پر شدت پسندوں کے خودکش حملے میں 12 سیکیورٹی اہلکار شہید ہوگئے۔ آئی ایس پی آر کے مطابق حملہ آوروں نے 19 نومبر کو چیک پوسٹ میں داخل ہونے کی کوشش کی، جسے ناکام بنا دیا گیا۔
حملے کے دوران فائرنگ کے تبادلے میں چھ شدت پسند ہلاک ہوگئے، لیکن اس کے بعد خودکش حملہ آور نے بارودی مواد سے بھری گاڑی دیوار سے ٹکرا دی، جس سے دیوار کا ایک حصہ منہدم ہوگیا اور چیک پوسٹ کو شدید نقصان پہنچا۔ شہید ہونے والوں میں 10 سیکیورٹی اہلکار اور 2 ایف سی اہلکار شامل ہیں۔
واقعے کے بعد علاقے میں سیکیورٹی فورسز نے آپریشن شروع کر دیا ہے۔
اس سے پہلے پیر کو روچہ چیک پوسٹ سے اغوا کیے گئے سات پولیس اہلکاروں کو باحفاظت بازیاب کرایا گیا تھا۔ بنوں میں حالیہ مہینوں میں شدت پسندی کے واقعات میں اضافہ ہوا ہے، جن میں پولیس اور سیکیورٹی فورسز پر متعدد حملے رپورٹ ہوئے ہیں۔
رواں سال کے اعداد و شمار کے مطابق خیبر پختونخوا میں پولیس اور سیکیورٹی فورسز کے 144 اہلکار شدت پسند کارروائیوں میں شہید ہو چکے ہیں۔
آئی ایس پی آر – مقامی پولیس حکام – جنگ نیوز – ڈان نیوز – جیو نیوز – دنیا نیوز – ایکسپریس نیوز
