دنیا کی مقبول ترین میسجنگ ایپ واٹس ایپ نے اپنی سروس میں ایک نیا تجربہ متعارف کراتے ہوئے اختیاری پریمیم سبسکرپشن پلان پیش کرنے کی تیاری شروع کر دی ہے۔ یہ فیچر اس وقت محدود صارفین کے لیے بیٹا ورژن میں دستیاب ہے، جبکہ عام صارفین کے لیے مرحلہ وار متعارف کرایا جائے گا۔
واٹس ایپ انتظامیہ کے مطابق اس پریمیم پلان کا مقصد صارفین کو اضافی اور جدید سہولیات فراہم کرنا ہے، تاہم ایپ کی بنیادی سروسز جیسے چیٹنگ، وائس اور ویڈیو کالز، اور میڈیا شیئرنگ بدستور مکمل طور پر مفت رہیں گی۔
ذرائع کے مطابق واٹس ایپ پریمیم سبسکرپشن میں متعدد منفرد فیچرز شامل کیے جا سکتے ہیں، جن میں خصوصی اسٹیکر پیکس، نئے تھیمز، ایپ کے ڈیزائن میں تبدیلی کے آپشنز، اور زیادہ چیٹس کو پن کرنے کی سہولت شامل ہے۔ اس کے علاوہ چیٹ نوٹیفکیشنز کے لیے مخصوص آوازیں اور ایپ آئیکن کو اپنی پسند کے مطابق تبدیل کرنے کا آپشن بھی دیا جا سکتا ہے۔
ان اضافی فیچرز کا مقصد صارفین کو زیادہ ذاتی، منفرد اور کنٹرولڈ تجربہ فراہم کرنا ہے، خاص طور پر ان افراد کے لیے جو ایپ کو زیادہ پروفیشنل یا روزمرہ استعمال میں رکھتے ہیں۔
کمپنی نے واضح کیا ہے کہ یہ پریمیم پلان مکمل طور پر اختیاری ہوگا۔ جو صارف سبسکرپشن حاصل نہیں کرنا چاہتے، وہ بغیر کسی رکاوٹ کے واٹس ایپ کی بنیادی سہولیات مفت استعمال کرتے رہیں گے۔
فی الحال واٹس ایپ نے نہ تو پریمیم پلان کی حتمی قیمت ظاہر کی ہے اور نہ ہی اس کے باضابطہ عالمی لانچ کی تاریخ کا اعلان کیا گیا ہے۔ کمپنی کا کہنا ہے کہ یہ فیچر ابھی آزمائشی مرحلے میں ہے اور صارفین کی رائے کے بعد اس میں مزید بہتری لائی جا سکتی ہے۔
واٹس ایپ کے مطابق سبسکرپشن ماڈل کا مقصد صارفین پر زبردستی ادائیگی کا دباؤ ڈالنا نہیں بلکہ انہیں یہ اختیار دینا ہے کہ وہ اضافی سہولیات کے بدلے ادائیگی کرنا چاہتے ہیں یا نہیں۔
